Ginserbihan sang search warrant ang ang isa ka negosyante nga nagabaligya sang peke nga sigarilyo sa Sitio Kawayanan Brgy. Tabuc Suba, La Paz Iloilo City.
Ini amo si Rogelio Gumaro Boniba, 57-anyos, kag residente sang nasambit nga barangay.
Sa interview sang Bombo Radyo kay PCOL Kim Legada, City Director sang Iloilo City Police Office (ICPO), iya ginpahayag nga natigayon ang amo nga operasyon matapos nag-request ang Japan Tobacco International sa ila talatapan bangud ila namonitor nga nagadata ang peke nga mga sigarilyo sa siyudad kag posible man sa kaprobinsyahanan.
Narecover kay Boniba ang kinarton sang peke nga sigarilyo nga ginabulubanta nagabalor masobra 1 ka milyon ka pesos.
Lakip sa narekober amo ang:
6 ka box (master case)
5 ka reams kag 6 ka packs sang Mighty Green
1 ka box (master case) kag 37 ka mga reams sang Camel
6 ka box (master case) kag 7 ka reams snag Marvel Green
5 ka box (master case), 28 ka reams kag 6 ka packs sang Winston Red kag 9 packs sang Marvel red.
Yara na sa kustodiya sang Iloilo City Police Station 2 si Boniba kag nagapadayon ang imbestigasyon sang kapulisan agud matumod kon sa diin ini nagakuha sang supply kag kun may mga kaupdanan pa ini.
