Nagabubo ang pagdayaw sa isa ka manugpaninlo sa Ninoy Aquino International Airport Terminal 3 (NAIA-3) matapos wala ini nagduha-duha nga magpanugid sa otoridad sang nakit-an sini ang medyas nga may unod nga $18,800 ukon P1.1-million.
Ang honest cleaner ang ginkilala nga si Rosalinda Celero, 41.
Nakit-an sini ang medyas sa idalom sang gang chair sa south wing sang departure area sang NAIA-3 kasunod sang final security checkpoint.
Gilayon sini nga gindala ang iya nakit-an sa lost and found section sang terminal.
Gina-check na subong sang security personnel sang Manila International Airport Authority (MIAA) ang closed-circuit television footage agud matumod kun sin-o ang tag-iya sang kuwarta kag kun paano natigayon nga mapalusot ini nga cash sa security checks.
Ginalantaw sang MIAA nga gin-smuggle sang tag-iya ang cash bangud sandig sa pagsulundan, tubtub lamang sa $10,000 ang ginatugutan sang Bangko Sentral ng Pilipinas nga dal-on sang pasahero.
Ginpanginbulahan naman ni MIAA general manager Eric Ines si Celero bangud nangin honest ini apisar daku nga kantidad ang iya nakit-an.
“We are delighted to have individuals like Rosalinda who exemplify strength of character and righteousness in the face of tempting situations,” kabahin sang statement ni Ines. “Her action is a testament to the values we uphold in NAIA. Truly, there are angels in our midst.”
Kilalahon si Celero kadungan sang July flag-raising ceremony sang MIAA kun sa diin natalana ini nga hatagan sang certificate of commendation.#
