Nagdangat sa masobra P2-million ang balor sang suspected shabu nga nakumpiskar sa drug buy bust sa Barangay Janipaan Olo, Cabatuan, Iloilo kun sa diin apat ang nadakpan lakip ang isa ka menor de edad.
Ang mga arestado amo sanday alias Jing, 44, residente sang Brgy. Damo-ong, Janiuay; alias Noel, 32, residente sang Brgy. Janipaan, Cabatuan; kag nobya ni alias Jing nga si Alyas Joyce, 20, residente sang Brgy. Cadagmayan Sur, Sta. Barbara.
Sa inisyal nga impormasyon, 16-anyos ang involved nga menor de edad sa amo nga operasyon.
Sa interview sang Bombo Radyo kay Police Captain Glenn Soliman, chief sang Regional Police Drug Enforcement Unit (RPDEU), iya ginpahayag nga nagdangat sa 400 gramos ang kabug-usan nga bug-at sang na-recover nga ginapasuni shabu.
Ini ang may standard drug price nga P2,720,000.
Magluwas diri, lakip man sa nakumpiskar sang awtoridad amo ang isa ka kalibre 38 nga pusil nga may tatlo ka bala, isa ka 12 gauge shotgun nga may bala, kag iban pa nga non-drug items.
Na-rescue ang menor de edad, samtang natugyan naman ang ginaalegar nga mga kaupdanan sini sa Cabatuan Municipal Police Station.#
