Dakup ang isa ka bodegero sa ginpatigayon nga drug buy bust operation sang Regional Police Drug Enforcement Unit (RPDEU) kag sang Tubungan Municipal Police Station sa Brgy. Igtuble, Tubungan, Iloilo.
Ang subject amo si Alyas Alex, 23, bodegero, kag residente sang nasambit nga lugar.
Sa interview sang Bombo Radyo kay Police Captain Alberto Manguilimotan Jr., hepe sang Tubungan MPS, iya ginpahayag nga duha na ka bulan ang monitoring sa subject nga nahibaluan nga may naga sugo lang sa iya nga mag dul-ong sang druga sa 1st district sa Probinsya sang Iloilo kag sa Iloilo City gamit ang motorsiklo.
Suno kay Manguilimotan, na-recover sa pag-hinakop sang subject ang 12 tanan ka plastic sachet sang suspected shabu lakip na ang buy bust item nga naga bug-at sang 330 grams kag may standard drug price nga ₱2,244,000.
Nakuhaan man ini sang .38 revolver nga armas luthang nga loaded sang 4 ka live ammunition.
Sa subong, yara na sa kustodiya sang Tubungan MPS si alyas Alex kag nagapangatubang sang kaso nga paglapas sa Republic Act 9165 ukon Comprehensive Dangerous Drugs Act of 2002.
