Balik sa presuhan ang isa ka 37-anyos nga lalaki matapos nakuhaan sang masobra tunga sa milyon ka pesos nga balor sang ginapasuni shabu sa drug buy bust sang kapulisan sa Zone 2, Brgy. Cubay, Jaro, Iloilo City subong nga gab-i, Agusto 9.
Ang arestado amo si alias Rolly, single, residente sang amo nga lugar, kag ginakabig nga isa ka high value individual.
Sa interview sang Bombo Radyo kay Police Captain Roque Gimeno III, officer in charge sang Iloilo City Drug Enforcement Unit (ICDEU), iya ginpahayag nga nakumpiskar sa posesyon ni Rolly ang 22 ka sachets sang suspected illegal drugs nga ginabulubanta nga masobra 90 grams kag may standard drug price nga P612,000.
Suno kay Gimeno, malapit duha ka semana man ang ila nga monitoring sa lalaki kasunod sang mga impormasyon nga masako ang baligyaanay sini sang droga sa barangay.
Nabukaran man nga yara ini sa lista sang Barangay Anti-Drug Abuse Council (BADAC) matapos nga nadakpan man anay sa kaangay sang kaso, kag nakaguwa lamang sang 2019 sang nag-avail ini sang plea-bargaining agreement.
Igatugyan ang illegal drug items sa Iloilo City Forensic Unit.
Yara naman si alias Rolly sa paghinakop sang Police Station 9 kag mahimo mangatubang sang panumbungon nga paglapas sa Republic Act 9165 ukon Comprehensive Dangerous Drugs Act of 2002.
