Nagdangat sa halos P623,000 ang nataban sang tatlo ka mga lalaki nga nagsulod kag nag-hold up sa opisina sang J&T Express sa Mc Arthur Drive, Brgy Qintin Salas, Jaro, Iloilo City pasado ‘las syete kagab-i.
Sa panaysayon sang mga personnel sang delivery company, samtang naga-conduct sila sang inventory, nagsulod ang mga suspek nga may dala nga armas kag nag-deklarar sang hold-up kag nagpamahog nga wala sang may mahulag.
Sa paglaragway sang mga personnel, lunsay naka-bonnet ang mga suspek.
Ginapahayag nakuha gikan sa opisina ang cash nga naglab-ot sa P622,966, wallet nga may automatic teller machine cards kag identification cards, kag cellphone.
Sa interview sang Bombo Radyo kay Alias Lester nga isa man sa rider nga naka-remit na sa amo nga delivery company kagab-i, sandig sa panaysayon sang nakakita, pag-abot sang hold-upper, nagpangtaya ini sang pusil sa anum ka mga personnel, gin-sirado ang roll-up, kag ginpaluhod antes ginkuha ang kuwarta.
Gilayon nga nagpalagyo ang mga suspek sakay sa motorsiklo.
Ginpahayag man nga wala pa sang na-install nga closed-circuit television kag wala man sang guwardiya sa opisina bangud bag-o pa lang ini nakasaylo sa amo nga area.
Padayon pa ang imbestigasyon kag ang follow-up operation sang mga pulis sa amo nga insidente. ##
