ILOILO CITY – Ginahandaan na sang Iloilo City Government ang pag-abot sang mga Locally Stranded Individual nga halin sa Metro Manila.
Sa interview sang Bombo Radyo kay Public Safety and Transportation Management Office Head Jeck Conlu kag nagaserbe man nga focal person on COVID-19 sang syudad sang Iloilo, iya ginpahayag nga ginabanta 130-140 ka mga Locally Stranded Individual ang maga-abot sakay sa sweeper flights.
Suno kay Conlu, kaina sang aga, nakapatigayon na sang inspection sa mga quarantine facilities kun sa diin 500 beds ang target nga maplastar agud nga sigurado nga indi ini pagkulangon.
Ginpahayag ni Conlu nga sa subong, ang ginatutukan sa pagpanghanda amo ang Jaro National High School nga isa sa pinakadaku nga eskwelahan sa syudad apang mahimo man nga makatinir sa hotel ang mga Locally Stranded Individual apang sila na ang magabayad sang akomodasyon.
Wala naman sang problema sa mga Returning Overseas Filipino bangud nga ang Overseas Workers Welfare Administration na ang nagaproseso sang repatriation lakip na diri ang hotel accomodation para sa quarantine.
Nahibalu-an nga buwas, Agosto 22, ang labing una nga adlaw sa pagpauli sang mga Locally Stranded Individual kasunod sang moratorium nga ginhingyo sang tagsa ka Local Government Unit.
Samtang, ang mas ginpasangkad nga contact tracing kag pagpatuman sang lockdown ang ginatudlo nga rason kun nga-a naganubo ang daily COVID-19 cases nga na record sa syudad.
As of August 20 (4:00 pm – 12 mn), naglab-ot lamang sa 18 ka COVID-19 cases ang na record sang COVID-19 team.
Kun lantawon ang record suno sa natungdan, 14 ang local transmission samtang apat lamang ang panibag-o nga kaso.
Ang kaso nga na record sa ginakabig nga hotspots kasubong sang Iloilo Fish Port Complex kag Business Process Outsourcing nga iQor ang wala na nadugangan pa.
