ILOILO CITY – Masobra pa lang sa 400 gikan sa masobra sa 1,000 nga parol nga ginpangtakod sa palibot sang syudad sang Iloilo ang napangkuha sang City Engineer’s Office.
Ang mga parol ang ginpangtakod para sa pagsaulog sang Christmas kag New Year apang tubtub subong wala pa sa gihapon nakuha.
Sa interview sang Bombo Radyo kay Engr. Salvador Pedregosa, pinuno sang City Engineer’s Office, iya ginpahayag nga naatrasar ang pagpangkuha sang mga parol bangud nga isa lang ka man lift truck ang ginagamit matapos nga naguba ang duha ka truck nga gingamit sadto sa pagpangtakod.
Suno kay Pedregosa, nagdugang pa gid sa pagkaatrasar amo ang ginpatigayon nga Chinese New Year bangud nga may yara sang tasking ang mga empleyado sang City Engineer’s Office.
Ginpahayag ni Pedregosa nga sa subong, nagapadayon ang pagpangkuha sang mga parol sa diin ang iban sa mga ini ang guba kag gabok na kag ginakahangaw-an nga makatuga sang halit ilabi na sa mga naga-agi sa dalan.
