Masobra sa 40 ka barangay sa syudad sang Iloilo, nadala sa high risk areas sa tion nga may yara sang bagyo nga maglaslas

ILOILO CITY–Masobra sa 40 ka mga barangay sa syudad sang Iloilo ang makabig nga high risk sa tion nga may yara sang bagyo nga maglaslas sa pungsod.
Ini matapos ang ginpatigayon nga disaster meeting nga ginpatawag ni Mayor Jose Espinosa III kaupod ang nagkala-in lain nga stakeholders.
Sa interview sang Bombo Radyo kay Dona Magno, pinuno sang City Disaster Risk Reduction and Management Office (CDRRMO), iya ginpahayag nga sa 40 ka high risk areas, 14 ka barangay ang makabig nga flood prone areas.
Bangud sini, ginmandu na ni Mayor Espinosa ang pag-activate sang tanan nga Barangay Disaster Risk Reduction Management Council (MDRRMC) bilang pagpanghanda sa paglaslas ni Bagyo Ompong.
Samtang, nagpahanumdum ang City Disaster Risk Reduction and Management Office (CDRRMO) sa tanan nga mag-aligmat kag maghanda sa posible epekto sang paglaslas sang Bagyo Ompong sa pungsod.
Suno kay Magno, kinahanglan nahibaluan sang publiko ang mga dapat himuon sa tion nga may kalamidad kasubong sang bagyo.
Magluwas sa pagpanalawsaw, nagakadapat man nga magpamati sa radyo kag dapat nga busisi-on anay ang mga impormasyon nga makita ilabi na sa social media.