BANATE, ILOILO – Masobra sa 400 ka mga benepisyaryo ang wala na nalakip sa listahan sa ika-duha nga hugnat sang Social Amelioration Program sa Banate, Iloilo.
Sa interview sang Bombo Radyo kay Glory Jean Bacayo, Municipal Social Welfare and Development Officer sang nasambit nga banwa, iya ginpahayag nga may mga benepisyaryo wala na nalakip sa listahan sa ika-duha nga hugnat nga nakabaton man sa una nga tagtaganay.
Suno kay Bacayo, iya nga ginhibalo sa Department of Social Welfare and Development Region 6 ang rason kun sa diin mahimo nga ang iban ang nakabaton na nga daan sang ayuda gikan iban nga ahensya sang gobyerno samtang ang iban naman ang may duplication sang pangalan.
Suno naman kay Mayor Carlos Cabangal Jr., wala sang poder ang Local Government Unit nga magpahilabot sa listahan sang mga benepisyaryo nga naka-agi na sa validation sang Department of Social Welfare and Development.
Sa baylo suno kay Cabangal, ang Local Government Unit ang nagabulig sa pagpatigayon sang cash distribution.
