ILOILO – Masobra sa 4,000 ang mga nagkaladakpan nga mga traffic violator sa probinsya sang Iloilo.
Sa interview sang Bombo Radyo kay Iloilo Police Provincial Office Director Police Col. Roland Vilela, iya ginpahayag nga naglab-ot na sa 4,082 ang nadakpan sa sulod sang isa ka bulan niya nga pagserbe bilang Director sang Iloilo Police Provincial Office.
Suno kay Vilela, mataas ang crime rate sa probinsya sang Iloilo sa diin kalabanan amo ang traffic accidents.
Ginpahayag ni Vilela nga humalin sang Enero tubtub Oktubre subong nga tuig, naglab-ot na sa 72 ang nagkalamatay bangud sa aksidente sa dalanon.
Bangud sini, luyag niya suno sa natungdan nga magbulig man sa road clearing operations paagi sa pagpangdakop sa mga indi lisensyado nga driver, indi rehistrado kag tuman na ka daan nga salakyan lakip na ang mga driver nga wala nagasunod sa traffic regulations.
