ILOILO CITY – Ginakahangaw-an sang gobyerno ang pagtaas sang unemployment kadungan sang pagpauli sang masobra sa 40,000 ka migrant workers.
Ini ang ginpahayag sa Bombo Radyo kay Department of National Defense Sec. Delfin Lorenzana may kaangtanan sa lihok sang gobyerno para mapadasig ang repatriation sang Overseas Filipino Workers.
Sa exclusive interview sang Bombo Radyo kay Lorenzana, iya ginpahayag nga ginabanta nga 42,000 migrant workers ang maga-abot sa pungsod sa masunod nga bulan.
Suno kay Lorenzana, antes pa man ang pandemya, madamo na nga daan ang wala ukon nadulaan sang trabaho sa pungsod kag magluwas diri, isa man sa ginakahangaw-an amo ang Locally Stranded Individuals nga wala pa nakapauli sa ila tagsa ka mga lugar.
Agud nga mapadali ang pagproseso sang repatriation, kinahanglan nga kumpletuhon lamang ang requirements kag sa tion nga maka-abot na sa pungsod ang migrant worker, gilayon ini nga ipaidalom sa COVID-19 test kag ang mga magpositibo lamang amo ang ipaidalom sa quarantine.
Kasubong man ang proseso sa pagpauli sang Locally Stranded Individuals ilabi na nga ginhalugan ang quarantine restrictions sa pila ka mga lugar sa pungsod kun sa diin ang bug-os nga Western Visayas ang nalakip sa Modified General Community Quarantine epektibo Hunyo 1.
Pangitaan naman sang paagi suno sa tiglikom agud nga ma rescue ang mga Filipino nga na stranded sa China lakip man ang sa Jeddah, Saudi Arabia.
