Masobra sa 50 ka pamilya, nadulaan sang balay matapos ang sunog sa duha ka barangay sa Jaro, Iloilo City

ILOILO CITY–Masobra sa 50 ka pamilya ang nasunugan sa boundary sang Brgy. Calubihan kag Taytay Zone II Jaro, Iloilo City.
Suno kay City Social Welfare and Development Office (CSWDO) head Gene Garingalao, nagdangat sa 44 ka pamilya gikan sa Taytay Zone II ang nasunugan samtang 18 ka pamilya naman gikan sa Brgy. Calubihan.
Ang sunog ang ginapahayag naghalin sa balay ni Chabilita Bunda sang Brgy. Calubihan kag ginapatihan nga ang kalayo ang bangud sa linya sang kuryente.
Ginpasigurado sang alkalde sang syudad sang Iloilo nga mahatagan sang bulig ang mga nabiktima sang sunog.
Sa interview sang Bombo Radyo Iloilo kay Iloilo City Mayor Jose Espinosa III, ginpahayag sini nga 5,000 pesos ang ihatag sa mga partially damaged nga mga balay kag 7,000 pesos naman sa totally burned.
Magluwas diri, magapatigayon man sang feeding program ang City Social Welfare and Development Office (CSWDO) sa mga nabiktima sang sunog.
Temporaryo naman nga nagtinir sa Jaro 1 Elementary School ang mga nasunugan.