ILOILO – Naka-umpisa na ang pagpanghatag sang ika duha nga hugnat sang Social Amelioration Program sa probinsya sang Iloilo.
Sa interview sang Bombo Radyo kay May Castillo, tagpamaba sang Department of Social Welfare and Development Region 6, iya ginpahayag nga naglab-ot sa 9,392 ang nahatagan gikan sa tatlo ka banwa sa probinsya sang Iloilo.
Kun pahat-pahaton suno kay Castillo, naglab-ot sa 3,142 ka benepisyaryo ang nakabaton sang P6,000 sa Batad, 1,974 sa San Rafael kag 4,276 naman sa Lemery.
Magluwas diri, ginpahayag ni Castillo nga naka-umpisa naman ang payout para sa Bacolod City kun sa diin nagalab-ot sa 75, 926 ang target beneficiaries.
Sa Iloilo City naman, ginpahayag sang natungdan nga may yara na sang schedule apang indi pa ini mahimo nga ipalayag bangud sa security purposes kag ang Local Government Unit na ang magapahibalo sa benepisyaryo.
May kaangtanan naman sa additional beneficiaries nga wala nakabaton sang 1st tranche, tuyo sang ahensya nga tingbon ang paghatag sang cash assistance.
Target sang ahensya nga malab-ot ang 80% accomplishment sa katapusan sang Hulyo samtang 100% naman sa Agosto.
