ILOILO CITY – Masobra sa isa ka libo nga mga personalidad ang imbitado nga magtambong sa pinakauna nga State of the Nation Address (SONA) ni President Ferdinand “Bongbong” Marcos Jr. sa masunod nga semana.
Suno kay House Secretary General Mark Llandro Mendoza, nagdangat na sa 1,365 invitations ang ipadala para sa SONA ni Marcos.
Dugang pa niya, may yara na sang ginpadala sang weekend kag ang iban ang pagwaon naman subong nga semana.
Ang pila sa mga imbitado amo sanday Vice President Sara Duterte, ang mga anay presidente, bise presidente, speakers, senate presidents kag subong man sa mga diplomatic corps, justices kag mga myembro sang Marcos cabinet.
Dugang pa ni Mendoza, 1, 200 ang initial capacity sang plenary hall sang Batasang Pambansa sang Quezon City ang gin-adjust agud nga ma-accommodate pa ang dugang nga mga bisita.
Nagapakig-angut na ang House of Representatives sa nagkalain-lain nga mga government agencies sa subong nga SONA.
Patigayunon naman ang lockdown nga magasugod sa Huwebes ukon sa Byernes sa House of Representatives para sa security purposes.
Sa subong, gina amat-amat na nga ginalimitahan ang pagsulod sang personnel sa Batasang Pambansa.
Sa lockdown, ang Presidential Security Group gid lamang ang pahanugutan nga magsulod sa complex.
Ang SONA sang ika-17 nga presidente sang Pilipinas ang hiwaton sa Lunes, Hulyo 25.
Wala pa sang detalye nga ginpagwa nagikan sa Palasyo nahanungod sa amo nga event.
Masobra naman sa 21, 000 ka mga personnel ang iga-deploy para sa SONA suno sa National Capital Region Police Office.
Patigyunon man ang gun ban sa Metro Manila humalin sa Hulyo 22 tubtob sa 27 agud nga mapasigurado ang kalinong sa tion sang SONA.
