ILOILO CITY – Gin-release na sang Iloilo Provincial School Board ang kabug-usan nga P11,025,000 para sa mga nagkalain-lain nga mga proyekto sa idalom sang “Bulig Eskwela sang Probinsya” ukon ‘BES PROBINS’ Program.
35 ka mga elementarya kag sekondarya nga mga eskwelahan ang nakabaton sang pondo pinaagi sa mga opisyal sang buluthuan kag barangay.
Lakip sa mga proyekto amo ang pagpatukod sang perimeter fence, gym, classroom, kag stage sa mga eskwelahan sa Guimbal, Leon, Ajuy, Dumangas, kag Tigbauan.
Ang iban nga mga proyekto ang nagalakip sang pagbakal sang laptops nga may dala nga printer, projector kag minor repair sang mga pasilidad sa eskwelahan.
Sa interview sang Bombo Radyo kay Iloilo Provincial Administrator Atty. Dennis Ventilacion, iya ginpahayag nga base sa ginpirmahan nga agreement, may yara sang timeline ang implementation sang proyekto kag ang pag-liquidate sini.
Suno kay Ventilacion, tagsa ka tuig, may yara gid sang ginapa-in nga pondo para sa proyekto sa mga eskwelahan nga nagasulod sa Iloilo Provincial School Board.
