Gin-isyuhan sang Commission on Audit (COA) ang Iloilo City Government sang notice of suspension kag notice of disallowance angot sa ginapahayag wala mahitso nga masobra P233 Million nga transaksyon sang gobyerno sang nagligad nga tuig.
Ang total audit suspensions ang nagdangat sa masobra ₱86 Million nga ginalakipan sang mga ginpamakal nga motor vehicles nga nagabalor masobra sa ₱25 million.
Gintukso sang COA ang ginpamakal sang gobyerno nga motor vehicles bangud wala sang supporting documents kag wala man sang authorization ang procurement transaction nagikan sa Secretary sang Department of Interior and Local Government.
Ang total audit disallowance naman as of December 31, 2020 ang naglab-ot sa masobra ₱146 Million.
Ang nasambit nga kantidad ang ginalakipan sang ₱488,328 nga travel allowances sang City officials kag employees, masobra ₱24 Million para sa Productivity Enhancement Incentive; kag masobra ₱19 Million nga gin-isyu sang Special Audit Team para sa construction sang bag-o nga Iloilo City Hall.
Ang pagpaggwa sang syudad sang amo nga pondo ang nakitaan sang COA nga wala sang valid appropriation ukon ligal nga basehan.
Ang masobra ₱39 Million nga Letter of Credit ang nagkadto naman sa ginbakal nga Compactor para sa Sanitary Landfill, apang nakitaan ini nga wala man sang supporting documents kag disbursement voucher rason nga wala ginpahanugutan.
Nahibaluan nga gina-isyu sa isa ka government agency ang notice of suspension sa tion nga makitaan nga wala sang legality, validity kag propriety ang expenditures ukon expenses.
Gina-isyu man ang notice of disallowance kun makit-an nga irregular, nagasolobra ukon unnecessary ang pagpaggwa sang pondo sang isa ka local government unit.
Sa subong, ginahulat pa sang COA ang justification kag kulang nga mga rekisitos sang syudad angot sa Minilyon nga unliquidated expenses sang nagligad nga tuig.
