ILOILO CITY – Aprobado na ni Presidente Rodrigo Duterte ang masobra sa P30.8 Billion nga grant sa idalom sang Bayanihan to Heal As One Act.
Sa exclusive interview sang Bombo Radyo kay Undersecretary Jonathan Malaya, tagapamaba sang Department of the Interior and Local Government, iya ginpahayag nga ginpirmahan na ni Presidente Rodrigo Duterte ang nasambit nga kantidad agud nga madugangan ang makabaton sang ayuda gikan sa Social Amelioration Program.
Suno kay Malaya, wala na sang rason nga magreklamo ang tagsa ka Local Government Unit nga kulang ang pondo sang Department of Social Welfare and Development bangud nga igahatag na sa labing madali nga tion ang masobra sa P30.8 Billion.
Ginpahayag ni Malaya nga ang tagsa ka Local Government Unit ang makabaton sang kantidad nga kabaylo sang isa ka bulan nga Internal Revenue Allotment kag ini ang mahimo man nga magamit sa paghatag sang food assistance, pagpahamtang sang isolation facilities kag iban pa nga kinahanglanon sa COVID-19 response.
Bangud sini, ginpahayag sang natungdan nga wala na sang rason nga may magreklamo nga indigents nga wala nakabaton sang ayuda.
Indi na kinahanglan nga magpirma sang Social Amelioration Program ang mga benepisyaryo sang Pantaid Pamilya Pilipino Program (4Ps).
Suno kay Director Irene Dumlao, tagpamaba sang Department of Social Welfare and Development, iya ginpahayag nga ang maximum nga mabaton sang indigents kasubong sang 4Ps ang nagalab-ot sa P6,000.
Suno kay Dumlao, bangud nga nagabaton lang sang P1,350 ang tagsa ka 4Ps beneficiary, kinahanglan ini nga dugangan sang P4,650 agud nga malab-ot ang maximum cash assistance nga dapat mabaton sa idalom sang Social Amelioration Program.
Ginpahayag ni Dumlao nga indi na kinahanglan nga magpirma sang Social Amelioration Program form ang 4Ps beneficiary bangud nga may yara na sila sang record sa Department of Social Welfare and Development.
Indi naman sakop sang Social Amelioration Program ang mga senior citizen nga may insurance ukon pension gikan sa gobyerno.
Sa pagpaathag ni Dumalo, prayoridad sang Social Amelioration Program amo ang mga pigado kag wala sang pangita nga mga senior citizen.
Ginpahayag sang natungdan nga ang basehan sang ahensya sa pagpili sang mga makabaton sang ayuda amo ang mga yara sa poverty line ukon ang mga wala sang palangabuhi-an.
