ILOILO CITY – Magatukod sang mobile laboratory sa Marawi City agud mapadasig ang pagkilala sang mga bangkay nga tubtob subong nagalapta pa sa siyudad bangud sang padayon nga engkuwentro sang tropa sang gobyerno kag Maute group.
Sa interview sang Bombo Radyo Iloilo, ginpahayag ni Regional Assemblyman Zia Alonto Adiong nga madamo gihapon nga bangkay ang wala pa makilala kag yara na sa advance state of decomposition.
Paagi sa mobile laboratory, mapadasig suno kay Adiong ang pagkilala sa mga bangkay.
Sa karon suno sa opisyal, ang mga bangkay nga makuha sang retrieval team ang ginapadala pa sa Iligan agud kilalahon.
Samtang ginatun-an na sa karon suno kay Adiong ang pagkutkot sang mass grave sa Marawi.
May nakita na ang mga ini nga lugar nga posible pahamtangan sang mass grave apang kinahanglan suno sa opisyal nga mangin sensitibo para sa mga Muslim.
Nagpangayo na sila sang legal opinion sa mga Sharia law experts may kaangtanan sa pagkutkot sang mass grave.
Suno kay Adiong, indi tanan nga napatay bangud sa engkuwentro kun sa diin ang iban ang napatay sa gutom kay dehydration matapos nga ma-trap sa kinagamo.