CANADA – Indi problema ang pagpatigayon sang mass testing para sa Coronavirus Disease 2019 (COVID-19) sa Canada.
Suno kay Bombo International Correspondent Vincent John Lozada, magluwas sa mass testing, may yara sang drive thru test sa Canada rason nga nagasaka man ang numero sang COVID-19 nga sa subong nagalab-ot na sa masobra sa 45,000, masobra naman sa 16,000 ang naka recover kag kapin sa 2,500 ang patay.
Ginpahayag ni Lozada nga sa tagsa ka adlaw, nagahatag sang update ang Health Department sang Canada kun sa diin ang pagpatigayon sang test ang nag-umpisa pa sang Enero.
Sang bulan sang Marso naman sang nag-umpisa ang mass testing kadungan sang pagpatuman sang lockdown kag ang tagsa ka governor sa Canada ang nagapangita sang paagi nga makabakal sang test kits kag Personal Protective Equipment.
Bangud nga nagadamu ang infected sang virus, ginaprayoridad sa mass testing ang mga may yara sang sintomas kag ang mga may close contact sa infected person.
Sa bahin naman sang hospital nga ginatrabahu-an sang natungdan sa Montreal, Quebec, may yara sang separado nga alagyan ang mga medical staff kag ang pasyente kag gindumili-an naman ang hospital visitation kun sa diin kalabanan sa infected amo ang mga tigulang nga yara sa home care facilities.
Kasubong sa iban nga mga pungsod, indi man malikawan nga may yara sang diskriminasyon sa mga Filipino kag medical personnel apang amat-amat naman ini nga nadula.
Sa pihak sang paniuc buying, bastante sa gihapon ang supply sang balaklon kag kasubong nga winter season ang sitwasyon sa Canada bangud nga ang frontliners kag ang mga may importante nga transaksyon na lang ang makita sa dalan.
