ILOILO CITY – Ginpasugtan na sang gobyerno ang pagbukas sang mga massage parlors sa mga lugar nga ginpaidalom sa general community quarantine (GCQ).
Santo sa Memorandum Circular No. 20-57 sang Department of Trade and Industry, ginapasugtan na ang pagbukas sang mga massage parlor sa GCQ areas, apang nagakadapat nga 30% lang sang total capacity ang pasugtan sa sulod.
Kaangot sini, ginpahalugan naman sa 50% ang ginapasugtan nga capacity sa mga massage parlor sa mga lugar nga naka modified GCQ nga pinakahalog sa apat ka quarantine standards nga ginplastar sang gobyerno agud mapunggan ang paglapta sang coronavirus disease (COVID-19).
Nagakadapat man nga magsunod sa minimum health standards ang mga massage parlor.
Kinahanglan man nga naka-gloves, kag ginadumilian ang pagmasahe sa ulo.
Nagakadapat nga ipatuman man ang regular disinfection kag gilayon nga ihaboy ang mga disposable materials.
Magluwas sini, ginpahalugan man ang kapasidad sa mga gym, salon, internet, computer shop kag non-essential services.
Sa subong, yara sa idalom sang GCQ ang Metro Manila, Batangas, Iloilo City, Tacloban, Iligan City kag Lanao Del Sur.
Samtang ang nabilin nga bahin sang pungsod ang yara naman sa modified GCQ.
