Nag-reklamo ang isa ka massage therapist sa Iloilo City matapos gintanyagan ini sang customer sang kuwarta kag ginpilit nga maghatag sang ‘extra service’ samtang yara sa sulod sang isa ka kuwarto.
Natabo ini sa ka hotel sa Benigno Aquino Jr. Avenue, Mandurriao, Iloilo City subong gid lamang nga gab-i.
Sa video nga ginpadala sa Bombo Radyo, makit-an ang isa ka lalaki nga ginabanta naga-edad sang 50-anyos tubtub 60-anyos, nagauyat sang kuwarta, kag Tagalog ang panghambal samtang ginapilit ang babaye nga batunon ang bayad basta iduot lang sini ang iya kinatawo.
Sa interview sang Bombo Radyo sa 29-anyos nga masahista, iya ginpahayag nga sang nag-abot na siya sa hotel pasado alas singko sang hapon, naga-istorya sa iya kliyente apang sang ulihi ginkumbinse na sini ang babaye nga hikapon ang iya kinatawo bangud mahatag man siya sang singko mil pesos.
Pahayag sang tag-reklamo, nagsige sa pagpamilit ang lalaki kag nagsaka na sa siyete mil pesos ang offer sini, tubtub nga sang ulihi, natulugan ini sa dalayon nga masahe.
Sang ginpa-atubang naman ini sang massage therapist, nagliwat naman ini sa pagpamilit sa babaye nga iduot lang sini ang iya kinatawo agud mapaumpawan siya bangud mapauli na siya sa ila lugar pagkaaga.
Dugang sang masahista, tuman pa gid ang iya kakulba bangud sang gina-masahe na niya ang lalaki sa ulo sini, nagakamang naman ang kamot sang customer sa iya nga butkon pakadto sa abaga rason nga ginwaslik niya ini.
Didto na kag nagtindog ang lalaki kag nagsaka sa otso mil pesos ang iya nga offer.
Tuman man ang kakulba sang massage therapist bangud nga gin-lock sang lalaki ang puertahan kag ginadudahan na nga nagakuha siya sang video kag naghana pa nga kuhaon ang cellphone sang masahista.
Ginkontak naman sang babaye ang ila spa agud nga matawagan ang staff sang hotel kag ma-check sila sa kuwarto.
Sang nakaabot na ang hotel staff, naabtan nga hublas na ang customer kag may ginauyatan nga kuwarta samtang didto na kag nakaguwa ang babaye sa hulot kag tuman ang pasalamat nga safe ang iya sitwasyon.
Nag-responde ang mga pulis sa hotel. Nag-file naman sang blotter report ang babaye kag subong nagaplano nga mag-file sang complaint para nga mahatagan leksyon ang lalaki kag para man sa safety sang kaangay sini nga mga masahista.#
(*This is not the actual photo)
