BAROTAC NUEVO, ILOILO – Magapatigayon sang massive disinfection ang Local Government Unit sang Barotac Nuevo, Iloilo kasunod sang labing una nga kaso sang Coronavirus Disease 2019 (COVID-19) sa nasambit nga banwa.
Sa interview sang Bombo Radyo kay Lemuel Fernandez, miyembro sang Task Force for COVID-19 sa nasambit nga banwa, iya ginpahayag nga umpisa buwas nga adlaw, magapatigayon sang pag-disinfect sa Ilaud Poblacion, Tabucan, Ilaya Poblacion kag lakip na ang merkado publiko.
Suno kay Fernandez, mahimo nga mangin sakop man sang massive disinfection ang mga kaiping nga barangay agud nga masiguro nga indi maglapta ang virus.
Ginpahayag man ni Fernandez nga sa subong, ginatutukan ang contact tracing sa mga tawo nga may close contact sa 59 anyos nga babayi nga COVID-19 patient.
Ang babayi suno sa natungdan ang isa ka negosyante kag antes pa man nakumpirma, ginapahayag nga nagbaton pa sang bisita nga mga seaman ang nasambit nga pasyente.
Sa masunod nga inadlaw, ginalauman nga magapaguwa sang Executive Order si Mayor Bryant Paul Biron tuhoy sa ipatuman nga Heightened Community Quarantine apang antes pa man sini, italana anay ang pagpanghatag sang food assistance sa mga pumuluyo.
