Nagsungka na ang technician,collector, kag ginatudlo mastermind sa pagpangransack sa isa ka E-Tap machine sa gwa sang The Mall Atrium, Iloilo City Proper.
Ang nagsungka amo si Ariston Jan Solis,28-anyos, sang Sta. Barbara, Iloilo.
Sa interview sang Bombo Radyo kay Police Captain Roque Gimeno III, hepe sang ICPS 1, iya ginpahayag nga bangud sa kabalaka ni Solis sa iya kabuhi, nagsungka ini paagi sa negosasyon sa tunga sang Provincial Intelligence Unit (PIU) sa Roxas City, nga ginapamunuan ni Plt. Col. Fernand Limbungan.
Suno kay Pcpt. Gimeno, natuad sang suspek nga madugay naman nila naplanuhan ini kag naobra ang amo nga buluhaton bangud sa nagbata ang iya asawa apang nabughat.
Nakuha naman sang kapulisan ang P10,000 nga nabilin sa parte ni Solis sa ila pagransack.
Priso subong si Solis sa ICPS1, upod ang duha sini ka kaupdanan nga nadakpan sang damlag lang, sanday Alyas Junjun nga nakuhaan sang P29,050 kag Alyas Serapio,nga nakuhaan sang P25,700.
Matandaan nga pito ka persona ang suspek sa pagransack kag ginabanta yara sa P340,000 ang balor sang nakuha nga cash sa nasambit nga machine.
