Patigayunon sa syudad sang Passi ang masunod nga hugnat sang Dugong Bombo sa Oktubre 28.
Sa interview sang Bombo Radyo kay Passi City Mayor Stephen Palmares, iya ginpahayag nga pangunahan sang Passi City Federation of Farmers Association ang nasambit nga bloodletting activity sa Passi City Arena.
Sa Oktubre 27 naman natalana nga patigayunon ang pre-screening sang mga magadonar sang dugo.
Nagpasalig naman ang alkalde nga sundon ang tanan nga health protocol kadungan sang aktibidad agud masigurado nga hilway ang tanan sa COVID-19.
“Bisan may pandemya, wala nagauntat ang iban naton nga social services. Ang dugo tuman ka importante. Ang aton nga bloodletting activity continous kag ginaimbitar ko gid ang mga pumuluyo kag ang mga taga-kaiping nga mga lugar nga sa Oktubre 28, ma-join kita sa activity para makatipon kita sang dugo kag makasalbar sang kabuhi,” pahayag sang alkalde.
