ILOILO CITY – Dako nga bugal para sa Iloilo City Police Office ang mataas nga accomplishment rating matapos makuha ang ikatatlo nga pwesto sa bug-os nga Police Regional Office 6 sa bulan sang Abril subong nga 2023.
Nahibaluan nga humalin sa Rank 9, nagsaka sa Rank 3 ang Iloilo City Police Office.
Sa interview sang Bombo Radyo kay Police Colonel Joeresty Coronica, director sang Iloilo City Police Office, iya ginpahayag nga nakuha sang Iloilo City Police Office ang 60% nga puntos para sa operational works, samtang 40% ang administrative works.
Suno kay Coronica, antes ini magpungko bilang director, nakuha sang opisina ang 90.95% rating sang Enero 2023 kag yara sa ika siyam nga pwesto.
Samtang, sang ini na ang nagpungko sang Pebrero 2023, nagsaka sa ikalima nga pwesto ang opisina nga may total rating nga 94.10%, kag 3rd rank sang Marso nga may 94.45% nga rating.
Ginpahayag dugang sang natungdan nga dako ang ginbulig sang mga operasyon sang Iloilo City Police Office agud mapapas ang krimen kag iligalidad sa siyudad.
Para kay Coronica, kinahanglan nga mas pasanyugon pa sang mga police personnel ang tagsa nila ka performance agud magpanumbalik ang pagsalig sang mga pumuluyo sa hanay sang mga kapulisan.
