𝗜𝗟𝗢𝗜𝗟𝗢 𝗖𝗜𝗧𝗬 – Nagpanawagan ang City Disaster Risk Reduction and Management Office (CDRRMO) sa mga residente nga maghalong agud makalikaw sa indi mayo nga epekto sang mataas nga heat index sa syudad sang Iloilo.
Ini ang kasunod man sang naobserbahan nga mataas nga heat index sa syudad sang Enero 1 tubtob Pebrero 3.
Sa interview sang Bombo Radyo kay Donna Magno, head sang CDRRMO, iya ginpahayag nga nagpadala na sila sang sulat kay Iloilo City Mayor Jerry Treñas sa diin ginpahibalo nila nga ang pinakamataas nga heat index ang narekord sang Enero 3 nga nagadangat sa 47 degrees Celsius sa Barangay Ungka, Jaro.
Samtang ang pinakamanubo naman ang 30 degrees Celsius kag narekord sa Arevalo sang Enero 28.
Nahibaluan nga gina-monitor ang heat index gamit ang Shell Automatic Weather Stations (AWS) nga makit-an sa Diversion, Mandurriao; Barangay Ungka, Jaro; kag Arevalo.
Santo sa Philippine Atmospheric, Geophysical, and Astronomical Services Administration (PAGASA), ang Dry Day Forecast humalin Enero tubtob Hunyo 2025 ang nagapakita sang pagtaas sang mga adlaw nga wala sang ulan.
