Gin-athag ni Buenavista, Guimaras Sangguniang Bayan Member Atty. Vincent De Asis nga ang reklamo sang pumuluyo sa mataas nga electricity rate sang Guimaras Electric Cooperative (GUIMELCO) ang nagtulod sa ila agud nga mag-file sang resolusyon.
Ini agud makuha ang kopya sang agreement sa tunga sang GUIMELCO kag mga power suppliers sini.
Sa interview sang Bombo Radyo kay Atty. De Asis, iya ginpahayag nga madugay na ni nga reklamo sang mga taga-Guimaras kag sa amo nga tikang, mahimo nga mapanubo ang presyo sang kuryente sa isla.
Suno kay De Asis, nagsulat man sila sa GUIMELCO nga magpangayo sang ila power supply agreement, apang wala sila naghatag kag nagsabat nga ang tikang ang isa ka confidential.
Ginkwestyon man sini kon ngaa mahal ang sukot sang kooperatiba apisar nga sila ang may wind mill sa ila lugar, kon sa diin, ginlaragway pa sini nga wala napuslan sang mga konsumidor.
Gin-athag man sang natungdan nga ang main purpose sang ila tuyo amo ang mapanubo ang bili sang kuryente sa Guimaras.
Nagalaum man si De Asis nga kontani boluntaryo na lang nga ipakita sa ila, apisar nga wala na sang resolusyon agud wala na sang madamo pa nga rekisitos.
Nahibaluan nga ang GUIMELCO ang may yara sang tatlo ka mga supplier sang kuryente, kon sa diin, may yara sang agreement.
