Ginpasalig sang Department of Agriculture (DA) nga amat-amat na nga maganubo ang presyo sang pila ka mga ulutanon subong nga semana.
Suno kay DA Assistant Secretary Arnel de Mesa, spokersperson sang ahensya, nagsugod na ang harvest sa Southern Tagalog Region gani paabuton nga may epekto na ini sa presyo sang mga produkto sa palaabuton nga mga inadlaw.
Matandaan nga isa sa talalupangdon nga nagsaka halin sang nagliligad pa nga semana amo ang kamatis kun sa diin sa Metro Manila, nagatupa na ang presyo sini sa P140-P200 kada kilo. Sa pila ka mga mercado naman sa Iloilo, lampas ini sa P100 kada kilo.
Una naman nga ginpaathag sang farmers’ group nga Philippine Chamber of Agriculture and Food Inc. nga magapabilin nga mataas ang presyo sini samtang nga tig-ululan sa Pilipinas.
Ang iban pa nga nakitaan sa pagsaka sa presyo amo ang carrots, ang talong, ang bell pepper, kag iban pa.
Sa bahin naman sang DA, una na nga gin-angot ni De Mesa ang pagmahal sang presyo sa pagka-atrasar sang pag-ani bangud sa pag-ilis sang tyempo, magluwas pa sa epekto sang El Niño phenomenon kag amo man sang naglaslas nga Bagyo Aghon.
Lakip man sa ginalantaw nga factor amo ang nagasaka nga presyo sang gatong nga may epekto man sa plete sang mga mangunguma ilabi na ang agricultural products halin sa mga malayo nga lugar kaangay sang Benguet, Baguio, kag Southern Tagalog.
