Natigayon nga makuha sang mga otoridad ang de kalibre nga mga armas kag bala sa ginpatigayon nga pagserbe sang search warrant sa San Lorenzo Guimaras.
Ang mga subject sang operasyon amo sanday Antonio Gabalez Coronia legal ang edad residente sang M. Chavez San Lorenzo Guimaras kag driver ni San Lorenzo Guimaras Vice Mayor Carmelina Meling Fernandez kag Edmundo Tamagos, legal ang edad kag residente sang Constancia San Lorenzo Guimaras.
Lakip sa mga nakuha sa balay ni Gabalez amo ang (1) ka hand grenade, (5) ka live ammunition sang .45 calibre pistol, (3) ka mga empty shells sang .45 calibre pistol kag iban pa nga mga accessories.
Samtang nakuha naman sa balay ni Tamagos ang (1) ka unit sang calibre 45 nga armas, (1) ka unit sang calibre 38 nga armas, 20mm explosives, (2) ka magazine sang calibre .45 sang armas, (22) pieces sang untarted bullets sang .45 calibre pistol, kag (22) pieces sang .38 calibre pistol.
Sa exclusive interview sang Bombo Radyo kay Police Capt. Carl Stephen Lee Betansos, hepe sang San Lorenzo Municipal Police, iya ginpahayag nga ang nasambit nga operasyon ang kasunod sang ila nabaton nga impormasyon nga nagahupot sang mga de kalibre nga armas ang mga natungdan.
Sanday Gabalez kag Tamagos ang ginapatihan duha sa apat ka mga suspek nga nagluthang patay sa pinuno sang Municipal Disaster Risk Reduction and Manangement Office (MDRRMO) sang San Lorenzo Guimaras nga si Exequiel Cabrieto, 58 anyos sang Barangay Cabungahan San Lorenzo, Guimaras.
