𝗖𝗘𝗕𝗨 𝗖𝗜𝗧𝗬 — Personal na nga nagtambong si Vice President Sara Duterte sa closing ceremony sang pungsudnon nga hinampang sa Cebu City Sports Center, matapos ang “no show” sang opening ceremony sang Hulyo 9 sa Palarong Pambansa 2024.
Sa speech sang bise-presidente sa closing ceremony, ginpasalamatan sini ang tanan nga local government units, opisina sang gobyerno, kag pribado nga sektor nga nagsuporta sa kadalag-an sang Palarong Pambansa.
Ginpanginbulahan man sini ang mga atleta sa ila partisipasyon kag performance sa ila tagsa ka sports.
Gin-engganyo man ni Duterte ang mga delegado nga dal-on ang “Cebuano trait” sa ila pagbiya sa syudad sang Cebu pagkatapos sang kahiwatan.
Suno kay Duterte, ang pinasahi nga kinaiya sang Cebuano amo ang ila ‘pagpabugal’ sa kultura, talento, pagtuo, kag pamilya.
Ginpahayag man sang natungdan nga dapat tinguhaan magkabuhi nga may kaalam, integridad, values, kag nagapadayon nga pagpalangga sa pungsod.
Nahibaluan nga si Duterte ang magapabilin nga DepEd Secretary tubtub Hulyo 19 kag pagabuslan ni Senator Sonny Angara.
Una na nga nagaguwa nga wala nakatambong si Duterte sa opening ceremony sang Palarong Pambansa bangud sa mas ginpili sini nga magpadulong sa Basilica Minore Del Sto. Niño de Cebu agud nga magpangamuyo pila ka oras antes magsugod ang opening ceremony sang Hulyo 9, 2024.
