Magabalik sa kumpetisyon sa Tokyo Olympics si Simone Biles, ang ‘greatest gymnast of all time’ kag ang ‘unquestioned face’ sang U.S. Olympic movement.
Sandig sa anunsyo sang USA Gymnastics, maga-compete si Biles sa last event final nga amo ang balance beam nga naka-schedule karon sa gab-i.
Ini ang iya una nga kompetisyon matapos ang iya pag-withdraw sa women’s team final sang nagligad nga semana bangud sang iya problema sa mental health kag physical safety.
Naghimo sang headlines sa bilog nga kalibutan ang pag-isol ni Biles sang nagligad nga event bangud siya ang ginakabig ‘biggest star’ sang Olympyada.
Sa edad nga 24 anyos, ang amo nga US superstar gymnast amo ang nagapanguna sa United States’ defense sa ila women’s gymnastics team title kag ginalauman kuntani nga madugangan ang iya apat ka bulawan nga medalya nga nadag-an sa 2016 Rio Olympics.
Ang iya makakilibot nga pagwithdraw sang nagligad nga semana ang ginbasol sa ‘twisties’.
Ang twisties amo ang pagkadula sang sense of space kag dimension sang isa ka gymnast samtang yara sa hangin rason nga nagakadula ang kontrol sa lawas kag mahimo ang mga ekstra nga twists kag flips bisan indi man hungod.
Apisar gin-anunsyo ang iya withdrawal sa multiple finals sang Hulyo 27, nagpadayon si Biles sa pag-train kag gin-evaluate sang USA Gymnastics staff.
