Patigayunon na subong nga aga, Hunyo 18, ang Game 5 sa tunga sang Boston Celtics kag Dallas Mavericks sa 2024 National Basketball Association (NBA) finals.
8:30 ini subong nga aga (oras sa Pilipinas) sa home floor sang Celtics sa TD Garden, Massachusetts, USA.
3-1 subong ang serye, kag posible nga diri na tapuson sang Celtics ang best-of-seven series kag makuha na ang ila ika-18 nga franchise championship ilabi na bangud subong man nga adlaw amo ang anibersaryo sang ila ika-17 nga kampyonato sang ginlutos sini anay ang Los Angeles Lakers sang 2008.
Apang daku ang paglaum sang Mavericks nga mahimo liwat ang milagro kag suliton sini ang natabo sa Game 4. Sa amo nga hampang, ginlutos nanday Luka Doncic ang team ni Jayson Tatum paagi sa 38-point margin of victory nga amo ang ikatatlo sa pinakadaku nga abanse sa bug-os nga maragtas sang finals sa NBA.
Nagpanguna si Doncic sa Mavs sa Game 4 nga may 29 points (25 sa first half), five assists, five rebounds kag three steals, samtang si Kyrie Irving naman ang nakadugang sang 21 points kag six assists.
Sa Game 5, nakalista nga “probable” si Doncic apang nag-post ang Mavs nga “ready for the battle” na ini; samtang sa Celtics, ginlista si Kristaps Porzingis nga kwestyonable.
Pananglitan magdaog ang Boston subong sa pagpanguna sang top stars nga sanday Tatum kag Jaylen Brown nga pareho nga paborito nga mangin Finals MVP, magapangibabaw na sila sa may pinakadamo nga kampyonato sa bug-os nga maragtas sang NBA. Magahatag ini sa ila sang isa nga abanse sa Lakers nga may yara subong sang 17 ka championship trophies.
(Photos: Celtics, Mavericks/FB)
