ILOILO CITY – Daku nga factor ang maternal health ukon ang ikaayong lawas sang iloy sa pag-angkon sang Cerebral Palsy sang lapsag.
Ini ang ginpahayag sa Bombo Radyo ni Dr. Elvin Tiangha may kaangtanan sa pagsaulog sang Cerebral Palsy Awareness and Protection Week umpisa Setyembre 16-24 sa tagsa ka tuig.
Suno kay Dr. Tiangha, ang Cerebral Palsy ang isa ka group of disorders nga naga-apekto sa ikasarang sa paghulag, pagbalanse kag posture kag ini ang most common motor disability sa tion sang childhood.
Ginpahayag ni Dr. Tiangha nga ang tinaga nga Cerebral ang nagakahulugan sang brain ukon utok samtang ang tinaga nga Palsy naman ang nagakahulugan sang muscle weakness ukon problems.
Ang nasambit nga group of disorders ang tuga sang damage ukon abnormal development sang utok nga amo ang naga-kontrol sang body movement kag ini ang mahimo nga matabo antes, samtang kag pagkatapos ibun-ag ang lapsag tubtub nga mag-edad sang pila ka tuig.
Kalabanan sa mga bata nga may yara sang nasambit nga kondisyon ang ginbun-ag nga may deperensya ukon Congenital Cerebral Palsy.
Lakip sa mga factor nga mahimo makatuga sang Cerebral Palsy sa mga lapsag nga yara pa lang sa tagu-angkon sang ila iloy amo ang damage sa white matter sang utok, abnormal brain development, pagdugo sang utok bangud sa stroke kag kakulang sang oxygen sa utok.
Para naman sa mga lapsag nga naga-edad sang 28 days ukon masobra pa nga naka-angkon sang Acquired Cerebral Palsy, lakip sa mga posible matabo amo ang brain damage ilabi na sa una nga mga binulan, infections kasubong sang meningitis ukon encephalitis, problema sa blood flow sa utok tuga sang stroke, blood clotting problems, abnormal blood vessels, heart defect, sickle cell disease kag head injury gikan sa aksidente ukon child abuse.
Agud nga malikawan ang risgo sa pag-angkon sang nasambit nga kondisyon, mas importante suno sa natungdan nga healthy ang iloy samtang nagabusong.
