ILOILO CITY – Ginpanindugan ni Presidential Assistant for the Visayas Jane Javellana nga matuod nga tawo si Cheska Lim, ang nagpakilala nga cabin crew kag nagpost sa social media batok kay Iloilo 1st District Rep. Janette Garin tuhoy sa natabo sang Marso 22.
Sa interview sang Bombo Radyo kay Javellana, iya ginpahayag nga para sa iya, indi bogus ang Facebook account nga Cheska Lim.
Suno kay Javellana, iya nga nakita ang social media post ni Lim kag kun binag-binagon, wala man sang malain sa nasambit nga post.
Ginpahayag ni Javellana nga ang punto lamang ni Lim amo ang ikaayong lawas sang tanan nga magasakay sa eroplano bangud nga ginakabig nga Persons Under Monitoring si Garin nga naghalin sa Metro Manila.
Santo sa iya pagpangusisa suno sa natungdan, nagatrabaho sa Philippine Airlines si Lim kag iya man nga tinguhaan nga makuhaan sang pahayag ang cabin crew tuhoy sa iya gin-post sa social media.
