Sa pihak sang mabaskog nga pagbubo sang ulan, indi ini nangin hupang sa ginpatigayon nga hublag-protesta sa nagkalain-lain nga bahin sang pungsod batok sa korapsyon sa pondo sang mga flood control projects.
Sa Baguio City, ang grupo nga “Baguio kag Benguet Batok sa Korapsyon” nagmartsa kag nagpanawagan nga pasabton ang mga opisyal kag indibidwal nga may kaangtanan sa mga “ghost” flood projects.
Sa Jaro, Iloilo City, nagpatigayon sang rally ang mga nagprotesta padulong sa provincial capitol samtang nagapangamuyo sang rosaryo.
Sa Bacolod, naglibot ang mga raliyista sa public plaza agud ipahayag ang ila kaakig batok sa mga substandard kag peke nga flood control projects.
Sa Aklan, nagpatigayon sang pangamuyo ang mga tawo samtang may gina-uyatan nga payong bilang simbolo sang ila pagla-om.
Sa Cagayan de Oro, may yara sang motorcade kag martsa nga ginpatigayon sa Plaza Divisoria.
Samtang, ginpanunahan naman sang mga kabataan ang isa ka mainit nga rally sa First Rizal Monument, sa Daet, Camarines Norte
Ang mga protesta kabahin sang padayon nga panawagan para sa hustisya sa mga flood control projects nga subong padayon nga gina-imbistigaran sang Senado kag Kongreso.
