Balantayan na subong nga adlaw, Hunyo 7, ang makahalawat-hawat nga imbukada nga hampang sa 2024 National Basketball Association (NBA) finals!
8:30 subong nga aga oras sa Pilipinas maga-umpisa ang best-of-seven series sa tunga sang Dallas Mavericks kag Boston Celtics sa TD Garden sa Boston, Massachusetts, USA.
Magluwas nga may home court advantage sa Game 1, daku man nga bagay para sa Celtics bangud matapos ang 10 ka hampang, nakakas na sa injury report ang center sini nga si Kristaps Porzingis kag ginalauman nga makahampang subong nga adlaw.
Ini nga 7-footer former All-Star ang wala nakahampang bangud sang injury halin sang Abril 29 sa Game 4 sa opening-round series sang Boston batok sa Miami.
Sa pagpanguna nanday Jayson Taytum kag Jaylen Brown, tuyo sang Celtics subong nga finals nga makuha ang ila ika-18 nga NBA title nga amo ang mas magabutang sa ila pangalan sa mas mataas nga pwesto sa Los Angeles Lakers sa lista sang all-time most successful team. Sang 2022, matandaan nga diutayan lang nga mahakwat sang team ang Larry O’Brien Trophy apang ginbalabagan nanday Stephen Curry kag Golden State Warriors.
Sa pihak nga bahin, apisar nagsulod sa Western Conference playoffs bilang fifth seed, impresibo ang record sang Dallas bangud nakahimo ini sang upset batok sa fourth seeds LA Clippers, top seeds Oklahoma City Thunder kag third seeds Minnesota Timberwolves sa playoffs antes nagkampyon sa division.
Pangunahan ni Luka Doncic kag Kyrie Iriving ang Mavs nga magahampang sa ila labing-una nga NBA Final sa sulod sang 13 ka tuig. Ang ila una kag nagaisahanon nga titulo ang nakuha sang 2011 matapos ginlutos sini ang Miami Heat.
(NBA)
