Mainit subong nga ginabantayan ang ginapahayag indi paghangpanay sa tunga sang mga lider sang Partido Demokratiko Pilipino–Lakas ng Bayan ukon PDP-Laban kun sa diin chairman si Presidente Rodrigo Duterte.
Kahapon, Mayo 30, nangin sentro sang kontrobersiya ang pahayag ni Presidential Spokesperson Atty. Harry Roque nga ginmanduan na ni Presidente Duterte ang party vice chairman nga si Energy Secretary Alfonso Cusi nga mag-organisa kag magpamuno sa ila nga national assembly subong nga Lunes, Mayo 31.
Bangud sini, nagkadto ang atensyon sang publiko sa kun ano ang mangin papel sang acting president sang PDP-Laban nga si Senator Manny Pacquiao.
Nagpahayag si Senator Pacquiao nga ang national council meeting ang dapat aprubahan sang party president kag party chairman — buot silingon, SIYA kag si PRESIDENTE DUTERTE.
Ginkwestyon pa sang kampo ni Pacquiao paagi kay PDP-Laban executive director Ron Munsayac ang nangin pahayag ni Roque.
Suno kay Munsayac, kun matuod nga may council meeting nga ginmandu si Duterte, katingalahan kun ngaa wala sila nakabaton sang formal communication halin kay President Duterte kundi isa lang ka announcement halin sa iya spokesperson NGA INDI MAN GANI MIYEMBRO SANG PARTIDO.
Ginpanindugan man ni Munsayac nga kuntani, sundon man ang husto nga proseso. Ginpahayag man sini nga magahingyo sila sang meeting sa tunga nanday Duterte kag Pacquiao agud maistoryahan sang maid-id ang agenda para sa LEGITIMATE nga national council meeting nga i-set isa ka bulan antes ang pag-file sang candidacies para sa masunod nga elections.
Nahibaluan nga Mayo 19 sang ginpahibalo ni Cusi si Pacquiao nga may yara sila sang assembly apang nagsabat si Pacquaio paagi sa memorandum sang nagligad nga Martes, Mayo 25, nga hugot nga nagaabiso sa mga miyembro sang partido nga indi pagsapakon ang ginapatawag ni Cusi nga assembly bangud si Duterte lang suno kay Pacquiao ang mahimo makapatawag sang national council.
Nahibaluan nga mas nagatunog man subong ang huring-huring nga magapadalagan sa pagka-presidente sa 2022 si Senator Pacquiao.
