“Ang ila [BFP] nga cutting of the ribbon, dasig man lang to. Ang bisita, 12 lang man. All the rest, BFP personnel naman. After sang cutting of the ribbon, may gamay nga messages. Siguro 30 minutes ang program. Ang ila to nga catering waay na ginpadayon. Ginhimos kag ginpatake-out na lang to sa ila nga mga personnel.”
Amo ini ang summary sang gathering sang Iloilo City Fire Station kahapon sang aga, Hunyo 10, kun COVID-19 team sang syudad ang pamangkuton.
Ang blessing kag inauguration sang Alta Tierra Village Substation sang BFP-Iloilo City ang natabo kadungan sang Activation of Emergency and Medical Services and Fire Motorcycle Units.
Sa interview sang Bombo Radyo kay Mr. Jeck Conlu, COVID-19 team spokesperson, iya ginpahayag nga nagmandu si Mayor Jerry Treñas sa iya kag kay COVID-19 team focal person Dr. Roland Jay Fortuna nga ‘tawgon ang attention’ ni BFP Regional Director Atty. Jerry Candido kasunod sang kontrobersyal nga kahiwatan.
May ‘mass gathering’ suno kay Conlu ang aktibidad apang ‘wala man naglawig’ bangud ‘gin-cut short ang program’ kag wala gindayon ang tingob nga pagkaon.
Suno kay Conlu, bisan nag-ako na si Candido nga may yara sang lapses sa ila bahin bangud sa inauguration and blessing sa ila bag-o nga substation, mapadala gihapon sila sang sulat para sa pagpaathag sang regional director.
Una na nga ginpahayag ni Candido nga wala siya nakahibalo sang executive order sang alkalde sang syudad nga samtang naka-modified enhanced community quarantine pa ang Iloilo City, istrikto nga ginadumilian ang mga mass gathering ukon pagtililipon.
Handa si Candido nga mag-atubang sa mangin desisyon sang Iloilo City Government kasunod sang ila ‘kapaltahan’.Yara man sa kahiwatan si Iloilo City Lone District Representative Julienne ‘Jamjam’ Baronda.
