Samtang wala nagabahar ang mga reklamo sang riding public batok sa pagpatuman sang kontrobersyal nga Local Public Transport Route Plan (LPTRP) sa syudad sang Iloilo, todo-pasalig naman ang Public Safety and Transportation Management Office (PSTMO) nga ginapanglista ang tanan nga problema kag ginapalab-ot sa Land Transportation Franchising and Regulatory Board (LTFRB) para sa posible nga adjustments.
Kahapon, Hunyo 24, nagpungko si Iloilo City Mayor Jerry Treñas agud pamatian ang sentimyento sang mga commuters sa syudad.
Sa interview sang Bombo Radyo sa alkalde, ginpahayag sini nga iban sa mga concerns ang nahatagan na sang sabat — kaangay sang hingyo nga ibalik ang daan nga ruta sang mga traditional nga jeep sa distrito sang Mandurriao.
Napalab-ot man ang problema nga temprano naga-untat byahe ang iban nga mga jeep sa Tacas, Jaro bangud ginapahayag ginabanggaan sang mga tricycle drivers kun gab-i. Natabo ini sa una nga semana sang implementasyon sang LPTRP.
Suno sa alkalde, natuon na ini sa peace and order management nga yara naman sa idalom sang Iloilo City Police Office (ICPO).
Sa separado naman nga interview sang Bombo Radyo kay PSTMO head Mr. Jeck Conlu, iya ginpahayag nga kun makit-an nga pwede na mapatuman ang adjustment sandig sa Traffic Routing Management Plan, ginapatuman na ini insigida sa syudad kag pwede man nga indi na pag-ipalab-ot sa national agency.
Halimbawa diri ang natabo nga pagpamati sa petisyon sang mga taga-Lapuz kag pagpabalik sang daan nga ruta sang tradional nga mga jeep.
Apang gin-athag ang PSTMO head nga may mga dalagku nga request nga ginakinahanglan ang approval sang LTFRB kag amo ini ang ginapanglista sang Iloilo City Government.
Sa una kag separado nga interview sang Bombo Radyo kay Conlu sini nga semana, una sini nga ginpahayag nga kun iduso gid ang hingyo sang publiko nga i-suspend ang LPTRP, problema ini sa transport cooperatives bangud nga nakapangutang na ang mga kooperatiba kag naka-hire na sang bag-o nga mga empleyado para sa modernization program sa syudad.
Suno kay Conlu, kun isuspinder ang LPTRP, indi sigurado kun ano ang matabo, posible nga ‘magsuprer ang mga kooperatiba kag indi na magdalagan ang transport system sa syudad’.
