Gindepensahan ni House Speaker Martin Romualdez ang paghatag sang cash assistance ukon ayuda sa mga pigado nga mga pumuluyo sa pungsod.
Ginhimo ini nga statement sa tunga sang kritisismo nga nabaton sang Kongreso sa P26 billion nga Ayuda Para sa Kapos and Kita Program ukon AKAP sa idalom sang ginaduso nga P6.325 trillion budget para sa 2025.
Ang AKAP isa ka inisyatibo sang Kamara nga una nga ginpondohan sa idalom sang 2024 national budget.
“To those who doubted the importance of social safety nets, let this be a reminder: ayuda is not charity; it is justice. It is our duty to ensure that no Filipino falls through the cracks, especially in times of crisis,” suno sa house speaker.
Nagpahayag man si Romualdez nga matuod nga mga tawo ukon lehitimo ang mga benepisyaryo sang AKAP kag wala ginsaway ukon wala sang notice of disallowance halin sa Commission on Audit (COA).
Nahibaluan nga ini nga notice ang gina-isyu sang state auditors kun may nakit-an nga iregularidad ukon matumod nga indi kinahanglanon ukon sobra-sobra ang gasto sa pondo. Sa masami, ang notice of disallowance ang ginasundan sang order nga ibalik ang pondo sa gobyerno.
“This is what governance means — not merely passing laws but ensuring that these laws translate into hope and dignity for every Filipino family. Sa mga kontra sa ayuda, handang ipakita ng administrasyong ito kung saan napunta ang bawat sentimong inilaan para rito,” dugang sini.
Ginplastar man sang house speaker nga indi ang Kongreso ang nagapadalagan sang cash aid program. Suno sa iya, ang Departments sang Social Welfare and Development, Labor, kag Health amo ang mga ahensya nga naga-implementar sang cash aid program.
“These agencies are the ones running the program, not Congress. Lahat ng programang ito: may totoong benepisyaryo. May totoong resibo. Walang notice of disallowance mula sa Commission on Audit (COA),” suno kay Romualdez nga ginpalakpakan naman sang mga kongresista.
Matandaan nga ang utod ni President Ferdinand Marcos, Jr. nga si Senator Imee Marcos ang isa sa nagpahayag nga ginagamit lamang ang AKAP agud nga makakuha sang boto ang mga pulitiko sa eleksyon — sentimyento nga pareho man sa ginaplastar sang Makabayan bloc sa Kamara.
