Wala nakahibalo si President Ferdinand Marcos, Jr. kun ano na subong ang iya relasyon kay Vice President Sara Duterte.
Prangka ini nga sabat ni Marcos halos isa ka bulan matapos ginsiling ni Sara nga wala sila naga-istoryahanay nga duha bangud una sa tanan, indi man sila mag-abyan.
Una na ginsiling ni Sara nga nangin runningmates lamang sila sa eleksyon apang indi gid sila kilalahay. Una man nga ginplastar ni Sara nga “never again” nga mag-updanay pa sila ni Marcos sa masunod nga eleksyon.
“Hindi kami magkaibigan unang-una. Nagkakilala lang kami dahil mag-running mate kami. So, bago pa man kami naging running mate, hindi na kami nag-uusap. Nagkausap lang kami during campaign at saka sa trabaho noon,” kabahin sang pahayag sang vice president sang Septyembre 18. “Ang kaibigan ko talaga si Senator Imee Marcos, kilala niya ako since 2012.”
Sang ginpamangkot naman si President Marcos, ginsiling sini nga dismayado siya nga mabatian nga indi sila “friends” bangud abi niya, mag-abyan sila.
“I don’t know anymore. I’m not quite sure I understand. I’m a little dismayed to hear that she doesn’t think that we are friends,” suno kay Marcos. ”I always thought that we were but maybe I was deceived.”
Ang pagbisita ni Marcos sa Laos para sa ASEAN Summit amo man ang una nga tion halin sang nagsugod ang Marcos administration nga indi si Duterte ang gintugyanan nga mangin official caretaker sang gobyerno.
Suno kay Marcos, ini nga arrangement ang ginhimo bangud indi naman parte sang administrasyon si Sara bisan nga siya ang bise-presidente.
“She’s not part of the administration anymore. She’s still in government but she left the administration,” pahayag sini. “She’s not part of the day-to-day running of what we are doing so it would be unfair to ask her to now, to impose that duty on her since that’s not part of her work now.”
Matandaan nga sang Hulyo sang nagbugras na si Sara sa Gabinete ni Marcos sang nag-resign ini bilang tiglikom sang Department of Education (DepEd).#
