Ginpasaka na sa Department of Justice (DOJ) ang panumbungon nga qualified human trafficking batok kay suspended Bamban, Tarlac Mayor Alice Guo kag iban pa nga Chinese nationals bangud sa ginaalegar nga kahilabtanan sa iligal nga mga aktibidad sang Philippine Offshore Gaming Operators (POGO).
Sa information nga gin-file sang Presidential Anti-Organized Crime Commission kag Philippine National Police-Criminal Investigation and Detection Group, gintawag ang alkalde bilang si “Guo Hua Ping”.
Suno kay DOJ Undersecretary and Inter-Agency Council Against Trafficking Chairperson Nicholas Ty, nagguwa sa mga ebidensya nga ang alkalde amo ang nag-apply para sa POGO, nagguwa man ang iya involvement sa lessor company, kag ang mga pangalan sini sa mga dokumento nga nakit-an sa sulod sang POGO compound.
Ginpahayag naman sang DOJ nga nagapadayon subong ang proceedings para sa pagpaguwa sang International Lookout Bulletin batok kay Guo. Posible suno sa opisyal nga mapirmahan na ini sang tiglikom sa masunod nga semana.
Ini nga bulletin ang nagamandu sa immigration officers nga i-report sa DOJ kag sa National Bureau of Investigation kun may tuyo ang isa ka tawo nga magbiya sa pungsod.
Nalakip man sa ginpasakaan sang reklamo ang 12 ka Chinese nationals nga mga opisyal sang Zun Yuan Technology Inc., Hongsheng Gaming Technology Inc. kag Baofu Corporation amo man si former Technology and Resource Center director general Dennis Cunanan.
Ang tatlo ka mga korporasyon ang nakitaan nga parte sang grand conspiracy para maghimo sang labor trafficking.
Ginpasalig man sang DOJ kay Guo kag iban nga respondents nga sundon ang due process bangud ini nga complaints ang subject pa sa preliminary investigation sang panel of prosecutors.
Ang human trafficking raps amo ang ikaduha nga set sang complaints batok kay Guo.
Una na nga nag-file ang Department of the Interior and Local Government (DILG) sang administrative complaints batok kay Guo kag iban pa nga municipal officials sa Office of the Ombudsman lakip na ang grave misconduct, serious dishonesty, gross neglect of duty and conduct prejudicial to the best interest of the service.
