Wala nakapakita sa hearing sa Senado, apang naka-post si suspended Bamban, Tarlac Mayor Alice Guo kadungan sang iya ika-32 nga kaadlawan agud nga pasalamatan ang mga tawo nga nagasuporta sa iya sa pihak sang mga kontrobersiya nga iya ginakaulamiran.
Sa iya malawig nga Facebook post, ginsiling ni Guo nga wala siya naghinulsol nga nagsulod siya sa pulitika apisar pa nga nasakitan siya sang mga nagakatabo subong sa iya.
Gin-isa-isa man sini nga ginpasalamatan ang mga grupo kag indibidwal lakip ang iya constituents, mga myembro sang municipal council, barangay officials, education sector lakip ang mga estudyante, amo man ang mga manunudlo kag school heads sa Bamban.
Pati senior citizens, businessmen, members sang LGBTQIA+ community, mga mangunguma, public utility vehicle drivers, kag religious community, ginpatpat kag ginpasalamatan man ni Guo.
Nag-sorry man ang alkalde sa tanan nga na-involve sa mga isyu nga nagapalibot sa iya kag nagpahanumdom man sa publiko nga untaton na ang pagpalapta sang ginpahayag sini nga sala nga mga impormasyon.
Bilang pagtapos sa post, ginsiling ni Guo nga siya isa ka Filipino, may daku nga korason para sa Bamban, kag palangga sini ang Pilipinas.
“Ako po ay magdarasal na malagpasan ko po ang mga pagsubok na ito. A big portion of my heart will always be for Bamban, for my town. Kayo po ang nagpuno ng puwang sa aking puso. Kayo po ang aking inspirasyon. Spread LOVE and peace to one and all,” kabahin sang post.
“Humihingi po ako ng paumanhin sa mga taong nadamay at pilit na idinadamay. Ako po ay nakikiusap din to stop spreading false information.”
“Ako po ay isang Filipino, at may malaking puso for Bamban…at mahal na mahal ko ang Pilipinas. Always remember ka Bamban, challenging but will never give up. Everything is temporary!” dugang ni Guo.
Nahibaluan nga nabuyagyag na sang National Bureau of Investigation (NBI) nga si Guo kag ang Chinese national nga si Guo Hua Ping ang isa lamang ka persona.
Nangin sentro ini sang Senate investigation bangud sa iya ginaalegar nga involvement sa iligal nga Philippine offshore gaming operations (POGO) sa Bamban.
