ILOILO CITY – Wala malingkang si Calinog Mayor Alex Centena sa pihak sang ginpaguwa ni Presidente Rodrigo Duterte nga updated list sang mga personalidad nga may kaangtanan sa iligal nga droga.
Ini apisar nagpamahog ang Presidente nga ang nasambit nga listahan ang mangin death certificate sa ulihi.
Sa interview sang Bombo Radyo Iloilo, ginpahayag ni Centena nga wala ini ginakulbaan bangud klaro ang iya konsiyensiya.
Ginpanindugan sang alkalde nga indi ini involve sa iligal nga droga kag wala man siya nagapabaya sa kampanya batok sa illegal drugs, sa iya banwa.
Nagapati si Mayor Centena nga pamulitika ang rason kun nga-a ginhingadlan ini sadto ni Presidente Rodrigo Duterte nga protektor sang iligal nga droga.
Suno pa kay Centena, wala gani isa ka porsiyento sang mga pumuluyo sang Calinog ang involve sa illegal drugs.