ILOILO CITY--Madamo sang mga plano si outgoing Iloilo City Lone District Congressman kag sa subong Mayor Elect Jerry Treñas sa iya pormal nga pagpungko bilang alkalde sang syudad sa Hunyo 1, 2019.
Sa interview sang Bombo Radayo kay Treñas, iya ginpahayag nga luyag niya matinluan ang palibot sang syudad.
Suno kay Treñas nga ginapatan-aw naman niya ang mga merkado sa palibot sa syudad sang Iloilo kun ano ang mga kinahanglanon pa nga mga pasilidad sa merkado.
Lakip na suno kay Treñas ang pagpa-estimate sang pagpa-obra sang merkado nga naga baha. Tutukan naman suno sa iya ang pagmanage kag pagmentina sang slaughter house sang syudad bangud indi niya luyag nga ang highly urbanized city kaangay sang Syudad sang Iloilo nga gina-ihaw ang sapat sa salog.
Magapahamtang man siya suno sa natungdan sang mga executive assistants sa kada departamento kaangay sang Department of Social Welfare and Development (DSWD), Engineering , City Health, planning, markets and slaughter house.
Samtang luyag naman niya nga mag move on na sa pila ka isyu agud mahimo na niya ang mga nagakadapat nga hilikuton agud mas mangin maayo ang standard sang syudad sang Iloilo.
Ginkalipay naman ni Treñas ang porsyon sang hagna nga magahatag sang automatic Philheath sa mga Persons with Disabilities (PWD’s).
Suno kay Treñas matigayun na ang paghatag sang wheelchairs, walkers, kag social pension kun may yara sang pondo sa mga PWD’s.
Luyag man niya nga matutukan ang pagpanghatag sang PWD cards sa mga nagakadapat nga mga benepisyaryo kag may mandato sa DSWD nga pagpasiguro nga insakto ang ginahatag nga mga cards sa mga PWD’s.
Samtang padayun naman ang ginahimo suno kay Treñas nga pagkoleta sang mga affidavits agud mapasakaan sang nagakaigo nga kaso ang pila ka empleyado sang Iloilo City Hall nga nagpangampanya sang tinalikdan nga May 13 midterm elections.
Dugang pa sang incoming nga alkalde sang syudad, may yara sang mga audio ukon voice recordings sang mga regular nga empleyado sang city hall nga nagapangampanya.
