ILOILO CITY – Ginkadlawan lang ni outgoing Iloilo City Mayor Jose Espinosa III ang akusasyon nga iya gingamit sa pamulitika ang propidad sang Iloilo City Government.
Ini ang kasunod sang pahayag ni incoming Iloilo City Mayor Jerry Treñas nga iya bawi-on ang mga salakyan, drone, computer set, LED wall, tarpaulin machine kag iban pa nga equipment nga ginapahayag overpriced kag gingamit sa pamulitika.
Sa interview sang Bombo Radyo kay Mayor Espinosa, iya ginpahayag nga ang mga nasambit nga mga propidad ang iya personal nga ginapanag-iyahan kag indi iya sang Iloilo City Government.
Sa pagkamatuod suno kay Espinosa, may yara siya sang ginbakal nga drone sa Hong Kong kag mas manami pa ipaanggid sa drone nga ginbakal sang Iloilo City Government nga nadula pagkatapos sang testing.
Magluwas sa drone, ginpahayag ni Espinosa nga may yara siya sang kaugalingon nga TV production samtang ang LED wall naman nga iya gingamit sa pagpangampanya ang iya nga gin-arkilahan.
Sa pihak sang mga akusasyon, ginpanindugan sang alkalde nga wala niya gingamit ang propidad sang Iloilo City Government para sa pamulitika.
