Ginpabugal ni outgoing Iloilo City Mayor Jose Espinosa III nga nadula ang bansag sa Syudad sang Iloilo bilang Most Shabulized City.
Sa interview sang Bombo Radyo Iloilo Kay Espinosa, iya ginpahayag nga sa idalom sang iya administrasyon, nadula ang Prevendido kag Odicta drug groups.
Suno sa iya, nadula man ang mga krimen nga naangot sa druga kag wala sang nag-eksister nga mga drug laboratories sa idalom sang iya pagpamuno sa syudad.
Ginpadayaw man ni Espinosa ang mga awards nga nabaton sang Iloilo City kaangay sang Most Improved City in Governance, Best Anti-Drug Program kag iban pa.
Matandaan nga gintawag ni Presidente Rodrigo Duterte bilang Most Shabulized City ang Iloilo City sang panahon sang administrasyon ni dismissed Mayor Jed Patrick Mabilog.
