ILOILO CITY – Itugyan na lang ni Iloilo City Mayor Jose Espinosa III sa City Disaster Risk Reduction Management Office (CDRRMO) kun ano ang mangin proseso sa paghatag sang tubig sa tagsa ka mga barangay sa syudad sang Iloilo.
Ini matapos nga pormal na nga gindeklarar ang State of Calamity sa syudad sa ginpatigayon nga special session sang Iloilo City Council sa diin walo ka mga opisyal ang nagtambong.
Sa interview sang Bombo Radyo kay Mayor Espinosa, iya ginpahayag nga iya gid nga ginapasalamatan ang mga opisyal nga nagpanikasog agud nga matigayon ang pagpaidalom sa syudad sa State of Calamity bangud sa kakulang sang tubig.
Sa pagkamatuod suno kay Espinosa, may yara na sang ginadihon nga plano agud mapadasig ang water delivery sa tagsa ka mga barangay nga maiwat ang tubig.
Ginpahayag man sang alkalde nga nga iya gid pamatud-an nga wala sang pamulitika nga matabo ilabi na sa paggasto sang calamity fund kasubong sang ginapahayag sang mga kontra-partido nga nag-boycott pa sa session.
Gintawag man niya nga istorya kuris-kuris ang mga ginapatu-patu sa iya nga may yara sang lamud pamulitika ang pagdeklarar sang State of Calamity.
Nahibalu-an nga lakip sa mga opisyal nga nagtambong sa special session amo sanday Iloilo City Councilors Plaridel Nava, Joshua Alim, Liezl Joy Zulueta-Salazar, R Leone Gerochi, Mandrie Malabor, Candice Tupas,Lyndon Acap kag Eduardo Peñaredondo.
