ILOILO CITY – Ginpanugyanan ni outgoing Iloilo City Mayor Jose Espinosa III ang mga drivers nga mangin disiplinado sa pagpadalagan sang mga salakyan .
Ini ang ginpahayag sang alkalde kasunod sang road mishap sa Sen. Benigno Aquino Jr. Avenue Mandurriao, Iloilo City sa diin nabungguan-patay sang Mazda MX5 sportscar ang mag-asawa nga sanday Joe Marie Osano, 49 anyos, principal sang Lapaz II elementary school kag tiayon sini nga si Alnie Dinah Pet Osano, 45 anyos, officer in charge sa Ticud Elementary School.
Sa interview sang Bombo Radyo kay Espinosa, iya ginpahayag nga apisar ipatuman ang speed limit ordinance, kun iresponsable ang mga drivers, indi sa gihapon matapna ang mga aksidente.
Suno kay Espinosa, apisar sportscar man ang ginamaneho, nagakadapat sa mag-konsiderar sa pagmaneho sang salakyan kag panumdumon ang road sharing.
Kun makit-an ang pedestrian lane suno sa alkalde, nagakadapat nga magpundo ang mga salakyan ilabi na kun may nagatabok sa dalan.
Sa bahin sang driver sang Mazda MX5 sportscar nga si June Paul Valencia, 32 anyos, nagakadapat nga atubangon sini ang konsekwensya sa pagbunggo-patay sa mag-asawa nga Osano.
